Çindəki partlayışa görə ölənlərin sayı açıqlandı

Çinin Hunan əyalətində fişəng fabrikində partlayış baş verİb. Hadisə nəticəsində ölənlərin sayı 26-ya yüksəlib.

Əyalətin səlahiyyətli qurumlarının açıqlamasına görə, hazırda hadisə yerində axtarış işləri davam edir. 61 nəfərin xəsarət aldığı bildirilir, itkin düşənlər var. Axtarış-xilasetmə əməliyyatına 500-ə yaxın canlı qüvvə, xeyli texnika və 3 robot cəlb olunub.

Xatırladaq ki, mayın 4-də yerli vaxtla saat 16:43-də Çanşa şəhərinin Liuyan prefekturasında fişəng fabrikində güclü partlayış baş verib. Yaxınlıqda 2 barıt anbarının yerləşməsi səbəbindən, yeni partlayış ehtimalları ilə əlaqədar olaraq sakinlər ərazidən təxliyə edilib.

Çin Xalq Respublikasının Sədri Si Cinpin itkin düşənlərin qısa zamanda tapılması və xəsarət alanlara yardım göstərilməsi barədə müvafiq qurumlara tapşırıq verib. Fövqəladə Halların İdarəedilməsi Nazirliyi xilasetmə əməliyyatlarına rəhbərlik etmək üçün hadisə yerinə ekspertlər qrupu göndərib. Fabrikin səlahiyyətli nümayəndəsi saxlanılıb.