Donald Tramp yenidən prezident seçiləcək?

“Trampı öldürəcəklər”. Bunu Amerikalı jurnalist bəyan edib.

Amerika isteblişmentinin ABŞ-nin keçmiş prezidenti Donald Trampdan qorxması və onunla işləmək üçün başqa üsulların olmaması onun öldürülməsinə səbəb ola bilər.

Xarici media xəbər verir ki, bu fikri tanınmış jurnalist Taker Karlson radio aparıcısı Adam Korollaya müsahibəsində bildirib.

Aparıcının Trampa yenidən ABŞ prezidenti seçilməsinə icazə verilib-verilməyəcəyi ilə bağlı sualına cavab verən tanınmış jurnalist xatırladıb ki, Amerika elitası Trampa qarşı o, hələ ilk dəfə seçilməzdən əvvəl etiraz aksiyaları təşkil edərək ona qarşı mübarizə aparmağa başlayıb.

Jurnalistin sözlərinə görə, impiçment proseduru başlamaq üçün ona böhtan atılıb, daha sonra 2021-ci il yanvarın 6-da Vaşinqtonda baş vermiş iğtişaşlarla bağlı Trampa qarşı sübutlar uydurulub.

Karlson qeyd edib ki, sadalanan bəhanələrin heç biri onlara Trampdan qurtulmağa kömək etməyib. Üstəlik, ona qarşı cinayət ittihamı irəli sürüldükdən sonra da onun populyarlığı durmadan artıb:

“Əgər siz tənqidlə başlayırsınızsa, sonra etiraza, daha sonra impiçmentə keçirsiniz, indi də ittihamnamələrdən istifadə edirsiniz və bunların heç biri işləmirsə, axırda nə olacaq? Öldürməyə yaxınlaşdığımız aydındır”.