Döyüşə hazırlıq | ABŞ hərbçiləri PKK ilə birgə təlimdə

ABŞ Mərkəzi Komandanlığı növbəti dəfə terror təşkilatı olan PKK/YPG ilə əməkdaşlıq etdiyini nümayiş etdirib.

Pentaqonun tabeliyində olan təşkilat bunu sübut edən görüntüləri sosial media hesabında paylaşıb.

Türkiyə mətbuatının xəbərinə görə, ABŞ əsgərləri terrorçulara təlim keçərək onlara “Kalaşnikov” avtomatından istifadə etməyi öyrədiblər.

Sözügedən hadisənin fotolarının Türkiyənin 12 şəhid verməsindən cəmi 3 gün sonra dərc olunması isə qardaş ölkədə ictimai qınağa səbəb olub. Türk əsgərlərinin Suriya və İraqda antiterror əməliyyatları davam edərkən sözügedən təşkilatların maliyyələşdirilməsini həyata keçirən rəsmi Vaşinqtonun bu paylaşımı etməsi birmənalı qarşılanmayıb.

Xatırladaq ki, ABŞ-nin Türkiyədəki səfirliyi regionda baş verən hadisədən sonra rəsmi Ankaranın yanında olduğunu vurğulayıb.

Verilən açıqlamada rəsmilər antiterror əməliyyatları zamanı həyatını itirən 12 türk əsgərinin ailələrinə və yaxınlarına başsağlığı verib, yaralananlara isə şəfa diləyib. Onlar həmçinin ABŞ-nin terrorla mübarizədə NATO müttəfiqi olan Türkiyənin daim yanında olduğunu da vurğulayıblar.