Dubayda kimlər öldürüldü? - ABŞ və İranın bu hücumları savaşı qızışdırdı! - Baku TV

İran İslam İnqilabı Keşikçiləri Korpusunun Hərbi Dəniz Qüvvələrinin həyata keçirdiyi kombinə edilmiş PUA və raket hücumu nəticəsində Birləşmiş Ərəb Əmirliklərinin Dubay şəhərində 40-dan çox amerikalı hərbçi öldürülüb.

Bu barədə "Tasnim" agentliyi SEPAH-a istinadən məlumat yayıb.

Məlumata görə, Hərbi Dəniz Qüvvələrinin Dubay şəhərində amerikalı hərbçilərin toplaşdığı məkanlardan birinə PUA hücumu zamanı orada 160-dan çox dəniz piyadası olub. Hücum zamanı yaralananların sayının 70-dən çox olduğu bildirilir.

Bu arada ABŞ Mərkəzi Komandanlığı İslam İnqilabı Keşikçiləri Korpusunun komanda-idarəetmə məntəqələrinin məhv edildiyini açıqlayıb. Bu barədə CENTCOM-un "X" sosial şəbəkə hesabındakı paylaşımında qeyd edilib.

"Davam edən əməliyyatlar çərçivəsində ABŞ qüvvələri SEPAH-ın komanda-idarəetmə məntəqələrini, hava hücumundan müdafiə vasitələrini, raket və pilotsuz uçuş aparatlarının buraxılış meydançalarını, həmçinin hərbi aerodromları məhv edib", – deyə məlumatda qeyd olunub.