Dünya gündəmindəki xəyanət CEO-nun arvadına nə qədər pul qazandıracaq?

ABŞ-nin Boston şəhərindəki “Coldplay” konsertində xəyanətinin ifşa olması “Astronomer” IT şirkətinin CEO-su Endi Bayrona baha başa gələ bilər.

Xəyanətinin üzə çıxmasından sonra ailəsindən və iş yoldaşlarından üzr istəyən E.Bayron istefa verib.

Əgər həyat yoldaşı ondan boşanarsa, E.Bayronun nə qədər pul itirəcəyi açıqlanıb.

“The New York Post”un yazdığına görə, işçisi Kristin Kabotla qucaqlaşdığı görüntüləri yayılan CEO-nun sərvəti 20-70 milyon dollar aralığında dəyişir.

Massaçusetsin 50/50 ailə qanununa görə, keçmiş baş direktor E.Bayron sərvətinin tən yarısını iki uşağının anası Meqan Kerriqanla bölüşməlidir. Ştat qanunları 7 ildən çox evli olan insanlardan topladıqları hər hansı aktivləri 50/50 nisbətində bölməyi tələb edir.

E.Bayronun sevgilisi olduğu iddia edilən Kristin Kabot üçün maliyyə nəticələri o qədər də ağır olmaya bilər. Onun “Privateer Rum” şirkətinin baş direktoru Endryu Kabot ilə qısa müddət əvvəl evləndiyi güman edilir.

Əgər cütlüyün nikahdan əvvəl evlilik müqaviləsi yoxdursa, vəziyyət dəyişə bilər. Bu cür razılaşmalara xəyanətlə bağlı xüsusi bölmələr də daxil ola bilər. Belə hallarda xəyanət edən tərəf keçmiş tərəfdaşına pul ödəməlidir.

Qeyd edək ki, konsert zamanı “Astronomer” IT şirkətinin baş direktoru Endi Bayronun qucaqlaşdığı şəxs həmin şirkətin İnsan resursları meneceri Kristin Kabot olub.