Dünyanın sonu üçün hazırlanan "Qiyamət anbarı"nda nələr saxlanılır?

Bu həftə qlobal fəlakətlərə qarşı bitki müxtəlifliyini qorumaq üçün yaradılmış xüsusi anbara daha 14 min yeni toxum nümunəsi əlavə edilib.

"Qiyamət anbarı" adlandırılan saxlanc yeri Norveçin Lonqyirbyuen qəsəbəsində, Şimal Qütb dairəsindən 1300 kilometr şimalda yerləşir.

Əgər bir gün böyük bir fəlakət baş versə və Yer üzündəki bitki örtüyü məhv olsa, nə baş verərdi? Məhz bu cür ssenarilərə qarşı dünyadakı kənd təsərrüfatı məhsullarını qorumaq məqsədilə Norveç hökuməti 2008-ci ilin fevral ayında "Qiyamət anbarı" yaradıb.

Burada təxminən 80 ölkədən 1,3 milyon toxum nümunəsi saxlanılır. Toxumlar dondurulmuş formada, torpağın təmin etdiyi təbii soyutma sistemi sayəsində qorunur. Üstəlik, anbar dəniz səviyyəsindən yüksəkdə yerləşdiyi üçün subasma riski də yoxdur.