Norveçdə tapılan gəminin məxsus olduğu ölkə və təyinatı məlum deyil

Arxeoloqlar Norveç sahillərində sahibsiz gəmi tapıblar.

Araşdırma zamanı onun 18-ci əsrə aid olduğu ehtimalı irəli sürülüb.

Tədqiqat nəticəsində gəminin 1700-cü illərin ortalarında bilinməyən səbəbdən qəza keçirərək batdığı məlum olub. Onun içindən çoxlu sayda Çin və Avropa istehsalı olan əşyalar çıxarılıb.

Bu barədə Norveç Dənizçilik Muzeyinin rəsmiləri bildiriblər. Muzeyin məlumatına görə, adsız yelkənli gəminin qalıqları arasında bir-birinə sıx şəkildə düzülmüş ağ və mavi çini qablar, qədəhlər, çilçıraq hissələri, tekstil məmulatları və taxıl aşkarlanıb.

Dənizçilik Muzeyindən bildirilib ki, gəmi Norveçin cənubundakı Skagerrak boğazında, təxminən 600 metr dərinlikdə bir xilasetmə şirkətinin sahibi tərəfindən aşkar edilib.

Tədqiqatçılar onu da qeyd ediblər ki, gəminin məxsus olduğu ölkə və təyinatı hələlik məlum deyil. Lakin qəza və yükü haqqında daha çox məlumat əldə etmək üçün araşdırmalar davam etdirilir.