Elmin izah edə bilmədiyi adam | Xəstə doğulub necə alim oldu?

11 noyabr 1951-ci ildə Pik ailəsində ilk uşaq dünyaya gəlir. Amma məlum olur ki, uşağın beynində bir çox patologiyalar var. Hidrosefaliya, yırtıq, beyin arakəsməsinin olmaması, beyincikdə zədənin olması uşağın gələcəkdə əqli və fiziki cəhətdən qüsurlu olacağından xəbər verirdi.

4 yaşına qədər yeriyə bilməyən autizm diaqnozu olan uşaq hərf və rəqəmlərə maraq göstərməyə başlayır. Kim iki yaşınadək oxumağı öyrənir.

Bir gün atası Frensis qəzet oxuyarkən 16 aylıq oğlunun da qəzet oxuduğunun şahidi olur. Uşaq 3 yaşında ciddi kitabları asanlıqla mənimsəyir və hər səhifəni fenomenal yaddaşına həkk edərək izahlı lüğətdən mükəmməl istifadə edə bilir.

14 yaşında Kim tam orta məktəb kursunu bitirir, lakin əlil olduğu üçün ona sağlam uşaqlara verilən sertifikatı almağa icazə vermirlər.

O, dünyanın bütün telefon kodlarını, ABŞ-nin poçt indekslərini, bütün küçələrin adlarını, milyonlarla insanın telefon nömrəsini və bu nömrələrin sahiblərinin adlarını yadında saxlayır.

Xüsusi mütaliə üsulu kəşf etmiş gənc kitabın sağ səhifəsini sağ gözü ilə, sol səhifəsini də sol gözü ilə oxuyur. Kim bir vərəqi 8-10 saniyəyə, bütöv bir qalın kitabı isə 10 dəqiqəyə oxuyub bitirir.

Qəribə yerişi və davranışı olan Kim Pik 33 il tənha həyat sürür və yalnız məşhur amerikalı yazıçı, Hollivud kinossenariçi Barri Morrou ilə tanış olduqdan sonra məşhurlaşır.

Yazıçının Kim və ailəsi ilə yaxından tanışlığı “Oskar” mükafatına layiq görülmüş “Yağış adamı” filminin yaranmasına səbəb olur. İnsanlar “Yağış adamı”nın əsl qəhrəmanı ilə görüşməyə can atırlar, ona görə də Piki müxtəlif tədbirlərə dəvət edirlər.

Məşhur Kim Pikə 20 il əvvəl verilməyən orta məktəb diplomu, nəhayət ki, verilir. İnsanlar ona “Kim Püter”, “Kim Kompüter” deyirlər.

Daha dəqiq tibbi müayinə edildikdən sonra bu fenomenin autizm deyil, savant diaqnozu olduğu aşkarlanır.

Ailə həyatı qurmayan Pik həyatının mənasını mütaliədə tapır və ömrünün sonuna qədər 12 000-dən çox kitab oxuyub yaddaşında saxlayır.

Fenomenal yaddaşa malik “Yağış adamı” Kim Pik 19 dekabr 2009-cu ildə doğulduğu Solt-Leyk-Siti şəhərində 58 yaşında ürəktutmadan vəfat edir.