Ən çox səyahət edilən ölkə siyahısında ilk yer dəyişmədi

Analitik və məsləhətçi şirkət olan “QlobalData” ən çox səyahət edilən ölkəni müəyyənləşdirmək üçün araşdırma aparıb. Hər il olduğu kimi, bu il də Fransa dünyanın ən çox turist axın edən ölkəsi olub. İkinci pillədə isə İspaniya qərarlaşıb.

Xatırladaq ki, pandemiyadan əvvəl il ərzində Fransaya 88,1 milyon insan axın edirdi. 2021-ci ildə İspaniya turist sayına görə birinci yerdə olduğunu iddia etsə də, Fransa ötən il 66,6 milyonla onu üstələyib. 2022-2025-ci illərdə isə bu ölkəyə səfər edənlərin sayının 12,1 % artacağı bildirilir.

“QlobalData” şirkəti səyahət üçün Fransanı seçənlərin sayının çoxluğunu nəqliyyat sisteminin daha əlverişli olması ilə əlaqələndirir. Belə ki, şəhərlərarası səyahət çox rahatdır və bunun üçün sürət qatarlarından daha çox istifadə olunur. Bu səbəbdən Avropa ölkələrinə getmək də asanlaşır.

Qeyd edək ki, Fransada bu il istifadəyə veriləcək yeni qatarlar sayəsində sərnişinlər Parisdən Vyana, Berlin və Milana da səfər edə biləcəklər.