Ən qədim çörəyin unikal dəyəri | Tunc dövrünün ləzzətli təamı yenidən satışda

Türkiyənin Eskişehir bölgəsinin ən əhəmiyyətli arxeoloji ərazilərindən biri olan Küllüoba kurqanında aparılan qazıntılar zamanı təxminən 5 min il əvvələ aid tarixi çörək tapılıb.

Bildirilib ki, tapıntı Erkən Tunc dövrünə aid olub və Anadoluda bişmiş halda aşkarlanan ən qədim çörək nümunəsi kimi unikal dəyər daşıyır.

Mütəxəssislərin köməkliyi ilə onun tərkibi analiz edilib və xüsusi reseptə əsaslanan “Küllüoba çörəyi” adlı məhsul hazırlanaraq 50 Türkiyə lirəsinə, təxminən 2 manat 18 qəpiyə satışa çıxarılıb.

Tərkibinə görə müasir çörəklərdən fərqlənən bu məmulatın hazırlanmasında daş dəyirmanda üyüdülmüş mərcimək unundan istifadə olunur. Aşağı qlüten səviyyəsinə malik çörəyin tərkibində heç bir konservant yoxdur. İstehsal zamanı yalnız təbii inqrediyentlərdən istifadə olunub. Bu isə çörəyin tarixi teksturasını və quruluşunu qorumağa imkan verib.

Qablaşdırmada həmçinin onun kəşfi və Küllüoba kurqanı ilə bağlı məlumatlar yer alır.