Epşteyn qalmaqalı daha da böyüyür | Kimlərin adı hallanır? - Baku TV

Böyük Britaniyanın Baş naziri Kir Starmer həftə ərzində istefa verməyə məcbur edilə bilər.

"Bloomberg" agentliyi hakim Leyboristlər Partiyasındakı mənbələrə istinadən məlumat yayıb ki, bu iddialara pedofiliyada ittiham edilən amerikalı maliyyəçi Ceffri Epşteynin dostu Peter Mendelsonun Böyük Britaniyanın ABŞ-dəki səfiri vəzifəsinə təyin edilməsi ilə bağlı qalmaqal səbəb olub. Bu qalmaqal Britaniya Baş nazirinin aparat rəhbəri Morqan Maksuininin istefasına gətirib çıxarıb.

"Bloomberg" yazır ki, hakim Leyboristlər Partiyasından olan millət vəkilləri P.Mendelsonun səfir təyinatına baxmayaraq, K.Starmerin hələ də vəzifədə qalmasına təəccübləndiklərini gizlətməyiblər.

"Downing Street", 10 ünvanında çalışan bəzi əməkdaşlar hökumət üzvlərinə gizli şəkildə zəng edərək Baş naziri istefaya razı salmağa və ya onu istefaya məcbur edəcək addımlar atmağa çalışırlar. Nazirlərdən birinin müşavirinin sözlərinə görə, K.Starmerin növbəti həftə vəzifədə qalma ehtimalı "50-nin 50-yə"dir.

Agentlik vurğulayıb ki, K.Starmer vəzifəsini qorumaq üçün 2025-ci ilin sentyabr ayında kabinetdən ayrılan keçmiş müavini Angela Rayneri geri qaytarmağı təklif edə bilər. Bundan əlavə, o, hazırkı enerji təhlükəsizliyi və karbon neytrallığı naziri Ed Milibəndi daha nüfuzlu bir nazirliyə rəhbər təyin edə və bununla da ambisiyalarını yerinə yetirə bilər. K.Starmerin istefa verməsi halında həm A.Rayner, həm də E.Milibənd baş nazir vəzifəsinə namizədlər kimi nəzərdə tutulur.

Görünür, fevralın 5-də Epşteyn qalmaqalında adı hallanan Mendelsona görə tribunada üzr istəmək Kir Starmeri xilas edə bilməyib. Artıq hökumət daxilində onun istefası tələb olunur.