Ərdoğan Ankaradakı bombalı hücumda ölən və yaralananların sayını açıqladı

Türkiyənin paytaxtı Ankaranın Kahramankazan rayonunda Türk Aerokosmik Sənayesi – TUSAŞ-ın binasına silahlı hücum olub. Bu barədə yerli media məlumat yayıb.

Bildirilib ki, yerli vaxtla saat 15:20 radələrində şirkətin girişində kamikadze hücumu həyata keçirilib.

Türkiyə Prezidenti Rəcəb Tayyib Ərdoğan baş verən terrorda 4 nəfərin öldüyünü, 14 nəfərin yaralandığını deyib. Qardaş ölkə lideri bunu Kazanda Rusiya Prezidenti Vladimir Putinlə görüşündə deyib.

Yerli medianın yaydığı məlumata görə, terrorçular çox sayda insanı girov götürüb. Polis hazırda ərazini mühasirəyə alıb.

Qeyd edək ki, 3 terrorçu nəzarət-buraxılış məntəqəsinə partlayıcı qurğu ataraq müəssisənin ərazisinə girib. Artıq onlardan 2-si polislər tərəfindən zərərsizləşdirilib. Digər terrorçunun zərərsizləşdirilməsi istiqamətində əməliyyat davam etdirilir.

Qeyd edək ki, bütün bunların fonunda Türk Aerokosmik Sənayesinin Ankaradakı müəssisələrinin birində növbəti partlayış olub. İnsidentın 5-ci nəsil döyüş təyyarəsinin istehsal olunduğu tikilinin girişində yaşandığı bildirilib.