Ermənistan gerbindəki gülüş stikeri

“Ermənistanın himni və gerbi dəyişdirilməlidir”.

Bunu ölkə parlamentinin sədri Alen Simonyan “Telegram”da yazıb.

O bildirib ki, himn erməni musiqisinə, qaydalarına uyğun olmalıdır. A.Simonyan Ermənistanın hazırkı himninin milli olmadığını diqqətə çatdırıb:

“Mənə elə gəlir ki, gec-tez Ermənistan Respublikasının himni dəyişdirilməlidir. O, bir dövlət himninin qaydalarına uyğun olaraq ölkəmizlə birbaşa əlaqəsi olmalı və əsl erməni ruhunda yazılmalıdır.

Mən iddia etmirəm ki, biz böyük Aram Xaçatryanın musiqisindən imtina etməliyik. Düşünürəm ki, əsər möhtəşəm, misilsiz və maksimum erməni musiqisinə yaxın yazılıb. Lakin aydındır ki, xarici mənşəli himnimizə düzəliş etmək artıq zəruri hal alıb.

Mənim fikrimcə, gerbimiz də dəyişilməlidir. Ən azından ölkəmiz su altında qala bilməz. Gerbimizdəki şir “Facebook”dakı gülüş stikeri kimi görünə bilməz, Ermənistanı qoruyan qılınc isə zəncirlənə bilməz”.

Qeyd edək ki, dövlət atributlarının dəyişdirilməsi məsələsi Ermənistanda ilk dəfə müzakirə edilmir. Bundan əvvəl yerli media Baş nazir Nikol Paşinyanın ölkəsinin gerbini və himnini dəyişdirməyə hazırlaşdığı haqqında məqalə dərc etmişdi.