Ermənistan Köçəryanın arzusunu ürəyində qoydu | Sensasiyalı xəbərin detalları

“Ermənistanın radikal dini-siyasi çevrələrinin hakimiyyəti zorla ələ keçirmək planı ifşa olunub”.

Bunu Ermənistan parlamentindəki hakim “Vətəndaş müqaviləsi” fraksiyasının katibi Hayk Koncoryan deyib.

“Bir neçə gün əvvəl hüquq-mühafizə orqanları bir neçə dəfə müxalifətin siyasi dəfn mərasimini təşkil etmiş Robert Köçəryan və Serj Sarkisyanın siyasi komanda yoldaşı Ktriç Nersisyanın (II Qaregin) xeyir-duasını almış Baqrat Qalstanyanın təşkilatçısı və rəhbəri olduğu çirkin, dəhşətli terror hücumunun qarşısını aldı və üzə çıxardı.

Baqrat Qalstanyanın Ermənistan və erməni xalqına qarşı həyata keçirməyi planlaşdırdığı bu terror planını ancaq Ermənistan və erməni xalqına dərin nifrət bəsləyənlər həyata keçirə bilərdilər. Əslində, bu, heç də təsadüfi deyil”, ‒ fraksiyanın katibi bildirib.

H.Koncoryan R.Köçəryan və erməni kilsəsinin hakimiyyəti qan tökərək ələ keçirmək istədiyini, amma bunun qarşısının alındığını qeyd edib.

“Xilaskarlıq ideyası xristianlığın mərkəzi tezislərindən biridir. Baqrat Qalstanyan Ktriç Nersisyanın xeyir-duası ilə “insanları xilas etmək” çağırışları ilə siyasi hərəkata başladı, amma sonda divarlar önündə insanları güllələyəcəkdi. Məsih insanları xilas etmək üçün çarmıxa çəkildi, B.Qalstanyan insanları “xilas etmək” üçün çarmıxa çəkmək istəyirdi. Xristian inancı və kilsəyə “xilaskar terrorçu”dan daha böyük zərbəni təsəvvür etmək mümkün deyil”, ‒ deputat əlavə edib.