Ermənistanda qadınlar hərbi xidmətə çağırıla bilər

Ermənistanda qadınlar hərbi xidmətə çağırıla bilərlər.

Ölkənin müdafiə naziri Suren Papikyan qanuna müvafiq dəyişikliyin edilməsi üçün parlamentə müraciət edib.

O, “Müdafiə haqqında”, “Hərbi xidmət və hərbçinin statusu haqqında” qanunlara əlavə və dəyişikliklər təklif edib. Bununla Ermənistan vətəndaşları olan qadınlara könüllü olaraq orduda xidmət etmək hüququ veriləcək. Beləliklə, əgər təklif qanunverici orqan tərəfindən təsdiqlənərsə Ermənistanda qadınlar könüllü olaraq 6 ay müddətinə hərbi xidmətə cəlb olunacaqlar.

Bununla yanaşı, qadınların çağırış gününə qədər xidmətdən imtina etmək hüququ da olacaq. Qadınlar hərbi xidməti yalnız təlim hərbi hissələrində keçəcəklər.

Onlar 6 aydan sonra tərxisetmə zamanı 1 milyon dram fəxri ödəniş alacaqlar. 6 aydan sonra Ermənistan Ordusunda xidmətini davam etdirmək istəyən qadınlar 5 il müddətinə müqavilə bağlaya bilərlər.