“Ermənistanda siyasi gündəliyi iqtidar müəyyənləşdirir” | Alen Simonyan

“Ermənistan müxalifəti birləşməlidir”.

Bunu Ermənistan parlamentində “Siyasi məhbuslar və hüquqların pozulması” haqqında bəyanat layihəsi üzrə dinləmələr zamanı “Daşnaksütyun”u təmsil edən və Ermənistan blokuna daxil olan deputat İşxan Saqatelyan deyib.

Onun fikrincə, birlik müəyyən məsələləri əhatə etməli və bununla bağlı siyasi məsləhətləşmələr aparılmalıdır. İlk növbədə, hökumətlə istənilən əməkdaşlıq dayandırılmalıdır. Saqatelyan bildirib ki, Ermənistan dövlətçiliyin itirilməsi təhlükəsi ilə üz-üzə qalıb.

“Ermənistanın indiki hakimiyyəti zorakılıq siyasətini reallaşdırmağa davam edəcək”.

Bunu isə “Azadlıq” partiyasından olan deputat Qrant Baqratyan bildirib.

Baqratyan İşxan Saqatelyanın müxalifətin birləşmə təklifini dəstəkləyib. Parlamentin spikeri Alen Simonyan isə bildirib ki, Ermənistanda müxalifət yoxdur. Çünki siyasi gündəliyi iqtidar müəyyənləşdirir: “Onlar, sadəcə, müxalifət rolundadırlar, erməni xalqına deyəcək sözləri yoxdur”.

Alen Simonyan əlavə edib ki, Ermənistanda müxalifətçilər danışdıqları söz yox, etdikləri qanun pozuntularına görə həbs olunurlar.