Ermənistanda taxıl əkin sahələri son on ildə kəskin şəkildə azalıb - Baku TV

Ermənistanın taxılla özünütəminetmə səviyyəsi əvvəllər də yüksək olmayıb, lakin son illərdə daha da aşağı düşüb. Bunu statistik rəqəmlər göstərir.

Hazırda daxili tələbatın təxminən 75 faizi idxal hesabına ödənilir. İdxal olunan buğdanın təxminən 99 faizi Rusiyanın payına düşür.

Bununla belə, Ermənistan hakimiyyəti Rusiyadan asılılığı azaltmağa çalışır. Bu günlərdə Baş nazir Nikol Paşinyan taxıl istehsalının səmərəliliyinin artırılması ilə bağlı tapşırıq verib.

Ermənistan rəsmiləri və ekspertləri müxtəlif vaxtlarda etiraf ediblər ki, ölkənin taxıl tələbatının 60 faizdən çoxu Azərbaycanın işğal altında olmuş ərazilərində aparılan əkinçilik hesabına ödənilirdi.

Bundan başqa, Azərbaycanın işğal altında saxlanılan torpaqlarındakı geniş otlaq sahələrindən istifadə olunması Ermənistanın heyvandarlıq və ət istehsalı üçün də mühüm mənbələrdən biri hesab edilirdi.

Azərbaycanın torpaqları 2020-ci ildə işğaldan azad edildikdən sonra Ermənistan bu imkanlardan məhrum olub və ölkənin ərzaq təhlükəsizliyi ilə bağlı problemlər daha qabarıq şəkildə özünü göstərməyə başlayıb.