Ermənistanda vəziyyət gərginləşir

“Hökumətdə vəziyyət çox gərgindir, nazirlər nəfəslərini tutaraq nəyi gözləyirlər?”

Bunu Ermənistanın “Jovoxurd” qəzeti yazır. Qəzetdə Ermənistanın Baş naziri Nikol Paşinyanın nazirlərdən narazı olduğu və yaxın zamanda hökumətdə istefaların gözlənildiyi deyilir.

Qeyd olunub ki, İrəvan Ağsaqqallar Şurasına seçkidən sonra vəzifəsini tərk edəcək ərazi idarəetməsi və infrastruktur naziri Qnel Sanosyan, ədliyyə naziri Qriqor Minasyan və ətraf mühit naziri Akom Simidyan daha çox diqqət mərkəzindədir. Həmçinin bildirilib ki, Nikol Paşinyan bununla kifayətlənməyərək yüksək texnologiyalar sənayesi naziri Robert Xaçatryanı və əmək və sosial məsələlər naziri Narek Mkrtçyanı da istefaya göndərəcək.

“Nazirlərin kimlərlə əvəz ediləcəyi bilinmir. Sirr deyil ki, hazırda N.Paşinyanın, demək olar ki, bütün komanda yoldaşları ilə münasibətləri gərgindir, o, heç kimə etibar etmir və bu səbəbdən istefaya göndərəcəyi nazirlərə əvəz tapa bilmir”, – deyə qəzet yazıb.

Qeyd edək ki, bundan əvvəl Ermənistanın “Hraparak” qəzeti də N.Paşinyanın yaxın zamanda bir neçə naziri istefaya göndərəcəyini, lakin bu mövzunun hələ gizli saxlanıldığını, dəyişikliklərin oktyabr ayı üçün nəzərdə tutulduğunu yazıb.