Ermənistanın bəzi məktəblərində Azərbaycan dili öyrədilir

2022-2023-cü tədris ilində Ermənistanda 12 məktəbdə türk dili, 4-də isə Azərbaycan dili tədris edilib. Bu barədə Ermənistanın Təhsil Nazirliyindən məlumat verilib.

Qurumdan bildirilib ki, Azərbaycan və türk dilləri yalnız 10-12-ci sinif şagirdləri tərəfindən öyrənilir. 2022-2023-cü tədris ilində 33 ümumi təhsil müəssisəsində regional dillərinin tədrisi təşkil olunub, onlardan 13-də fars, 3-də gürcü, 12-də türk və 4-də Azərbaycan dili tədris olunmağa başlayıb.

Məlumatda qeyd olunub ki, daha 400 erməni məktəbi yaxın gələcəkdə regional dilləri, yəni türk, Azərbaycan, gürcü və fars dillərini öyrənmək istədiklərini ifadə ediblər. İnformasiyaya əsasən, hazırda Ermənistanın bütün məktəblərində 2-ci sinifdən başlayaraq xarici dil kimi rus və ingilis, fransız və ya alman dilləri tədris olunur. Bundan sonra məktəblərdə üçüncü dil kimi region ölkələrinin dillərinin tədrisinə də diqqət yetiriləcək.