Fələstin müqavimət hərəkatı hələ ABŞ-nin təklifinə cavab verməyib

ABŞ HƏMAS yaraqlılarına gərginliyi azaltmaq və dayanıqlı atəşkəs əldə olunması üçün Qəzza ərazilərini tərk etməyi təklif edib.

Məlumatı “Axios” portalı yayıb.

Belə ki, HƏMAS yaraqlıları Misir və Qətər vasitəsilə hazırda İsrail Ordusunun nəzarətində olan ərazilərdən təhlükəsiz keçid şansı qazana bilərlər.

Məqsəd atəşkəsi sabitləşdirmək və Qəzzanı silahlı qruplardan təmizləməkdir. İsrail Ordusunun nümayəndələri təklifdən xəbərdar olduqlarını təsdiqləsələr də, heç bir HƏMAS yaraqlısının İsrailin nəzarət zonasını tərk etmək fürsətindən istifadə etmədiyini vurğulayıblar.

Qəzzada hərbi əməliyyatların davamı İsrailə qarşı siyasi təzyiqi artırır. ABŞ gərginliyi aradan qaldırmaqla həm İsrailin yükünü azaltmağa, həm də beynəlxalq imicini qismən bərpa etməyə çalışır. Başqa bir səbəb isə Qəzzaya nəzarətin tez bir zamanda bərpa edilməsi ilə bağlı prosesə başlamaqdır.

İsrail HƏMAS-ı Qəzzadan çıxarmaqla döyüş zonalarını məhv etməyi və tezliklə vilayətdə hakimiyyəti bərpa etməyi hədəfləyir. Vaşinqtonun niyyəti qurulacaq yeni sistemin hansısa təhlükəyə məruz qalmasını önləməkdir.

Başqa bir səbəb isə humanitar böhranın aradan qaldırılmasıdır. ABŞ bu yolla BMT və digər beynəlxalq qurumların Qəzzaya girişini asanlaşdırmaq, humanitar yardımı artırmaq istəyir.

Bu təklifin qəbulu HƏMAS daxilində parçalanma yarada bilər. Çünki döyüşü davam etdirmək və ya müqavimət göstərmək istəyən qruplar mövcuddur. HƏMAS-ın Qəzzadan çıxışı məğlubiyyət və Fələstin müqavimət hərəkatının sonu kimi yozulur.

Ən önəmli məsələ isə HƏMAS-ın Qəzzadan sonra hara gedəcəyidir. Əgər təşkilat ABŞ-nin təklifi ilə razılaşarsa, böyük ehtimalla HƏMAS üzvləri Misir və Qətərə köçə bilərlər.