Finlandiya NATO-ya rəsmi üzv oldu

Finlandiya NATO-nun 31-ci üzv ölkəsi oldu. Ölkənin Alyansa qəbulu ilə bağlı rəsmi mərasim aprelin 4-də təşkilatın Brüsseldəki mənzil-qərargahında keçirilib.

Finlandiya NATO-ya İsveçlə birgə daxil olmaq niyyətində olsa da, Stokholm Ankaranın Türkiyədə terrorçuluqda ittiham olunan şəxslərin ekstradisiyası ilə bağlı bütün tələblərini hələ də yerinə yetirmədiyi üçün Türkiyə İsveçin Alyansa girişinə izn verməməkdə davam edir.

NATO Baş katibi Yens Stoltenberq Alyansın iclasından əvvəl jurnalistlərin suallarını cavablandırarkən bildirib ki, əslində, Rusiyanın istəyi daha kiçik bir NATO idi.

"Prezident Putin sərhədlərində daha az NATO görmək istəyirdi. O, Alyansın qapılarını bağlamaq istəyirdi. Lakin bunun əksinə nail oldu. NATO müttəqifləri daha yaxşı hazırlıq vəziyyətinə gəldi, Alyansın müxtəlif qanadlarında onun hərbi mövcudluğu daha da gücləndi, NATO-ya yeni üzvlər qoşuldu. Bu gün Finlandiya Alyansa üzv oldu, inanıram ki, tezliklə İsveç də Alyansın tamhüquqlu üzvü olacaq", - deyə o bildirib.