Fransa Ermənistana bir çox ölkənin arzusunda olduğu yeni silahlar verdi

“Fransa bir çox ölkənin arzusunda olduğu hərbi texnikanı Ermənistana verib”.

Bunu Fransanın Ermənistandakı səfiri Olivye Dekottini sosial media hesabında yazıb.

Bildirib ki, ölkənin hərbi zavodlarından biri son aylarda üç ədəd ən müasir “GM 200” radarını məhz Ermənistan üçün ixrac edib.

“Politico” nəşrinin məlumatına görə, sözügedən radar sistemləri havadan gələn təhlükənin vaxtında aşkarlanması üçün nəzərdə tutulub.

Tətbiq olunan yeniliklər sayəsində bu sistemlər pilotsuz uçuş aparatlarını da identifikasiya etməyə qadirdir. Onların arasında “GM 400 Alpha” adlı radar qurğusu xüsusilə fərqlənir. Qiyməti 30 milyon avro dəyərində olan bu qurğu 250 kilometrdən 500 kilometrədək olan məsafədəki hədəfləri aşkarlaya bilir. Ondan bir sinif aşağı olan “GM 200” isə 350 kilometrədək məsafədə yerləşən obyektləri müəyyən edir.

Məlumat üçün bildirək ki, Parisdən 50 kilometr cənubda yerləşən və “Thales” şirkətinə məxsus olan bu zavod əsasən “Ground Master” adlanan və hava məkanının müşahidəsi üçün nəzərdə tutulan müasir avadanlıqların istehsalı ilə məşğuldur.

Bildirilib ki, şirkətin ən böyük sifarişçisi elə Fransa dövlətinin özüdür. Buna səbəb isə odur ki, rəsmi Paris şirkətin məhsulu olan hərbi müşahidə vasitələrini aylar öncə Ermənistana göndərməyi qərarlaşdırıb.

Məqalədə o da qeyd olunub ki, şirkətin müştəriləri arasında Ukrayna, İndoneziya və Mərakeş də daxil olmaqla 40 ölkənin adı çəkilir.