Fransanın mərkəzində bina uçdu

Aprelin 9-na keçən gecə Fransanın Marsel şəhərinin mərkəzində yaşayış binası uçub.

Bu barədə şəhər meri Benua Payan “Twitter”də məlumat yayıb. Onun sözlərinə görə, hadisə yerində xilasetmə işləri aparılır.

Ölkənin daxili işlər naziri Jerald Darmanin hadisə yerində jurnalistlərə bildirib ki, çökən yaşayış binasının dağıntıları altında 10-a yaxın adamın qaldığı güman edilir, lakin yaxınlıqdakı binaların da uçmaq təhlükəsi yarandığından xilasetmə işləri ləngiyir. Nazir qeyd edib ki, hadisə nəticəsində 6 nəfər xəsarət alıb, onların həyat təhlükəsi yoxdur.

“Ehtiyat tədbiri olaraq qonşu evlərin sakinləri dərhal təxliyə edilib, onlardan 33 nəfərə həkimlər tərəfindən tibbi yardım göstərilib. Hakimiyyət həmçinin ərazidəki digər evləri də boşaltmağı planlaşdırır, ümumilikdə söhbət onlarla binadan gedir”, - deyə nazir əlavə edib.

İnsidentlə bağlı Marsel prokurorluğunda araşdırmalara başlanılıb. Bəzi Fransa KİV-i isə binanın uçmasından əvvəl partlayış səsi eşidildiyini yazıblar.