Gecə qəfil yuxudan oyanmanın səbəbi açıqlandı

Bir çox insanın gecə saat 2-3 radələrində qəfil yuxudan oyanmasının səbəbi məlum olub.

Araşdırmalarla məlum olub ki, gecə oyanmaları çox vaxt səsdən və ya işıqdan deyil, birbaşa orqanizmin biologiyasından qaynaqlanır.

Ekspert Maykl Breusun sözlərinə görə, axşam saatlarında bədən temperaturu tədricən aşağı düşür, bu da melatonin hormonunun ifrazına və dərin yuxuya keçidə şərait yaradır. Lakin gecənin irəliləyən saatlarında orqanizm yenidən isinməyə başlayır və məhz bu temperatur artımı insanın oyanmasına səbəb ola bilər.

Mütəxəssis vurğulayıb ki, bu cür oyanmalar tamamilə normal fizioloji prosesdir: "Müəyyən məqamda bədən yenidən isinməlidir, əks halda, soyuma riski yaranır. Məhz temperaturun tənzimləndiyi bu keçid anında insanlar yuxudan ayılırlar".

Onun sözlərinə görə, əksər insanlar bu qısa oyanmadan dərhal sonra yenidən yuxuya gedir və prosesin fərqinə varmırlar. Əgər oyandıqdan sonra yenidən yuxuya getmək mümkün olmursa, bu, yuxusuzluq əlaməti ola bilər. Belə hallarda mütəxəssis yuxu rejimini, stres səviyyəsini və yataq otağındakı mühiti tənzimləməyi tövsiyə edir. Əgər bu addımlar kömək etmirsə, qısamüddətli psixoterapiya ən effektiv həll yolu kimi göstərilir.