Gələcəyimiz bu aksiyalardan asılıdır! - Zurabişvili Gürcüstan xalqına səsləndi

Gürcüstanda hökumət əleyhinə etirazlar davam edir.

Parlament binası qarşısında istehkam quran və 4 gündür ərazini tərk etməyən aksiya iştirakçılarını dağıtmaq üçün polis su şırnağı və gözyaşardıcı qazdan istifadə edir.

Etirazlara hökumətin Avropa Birliyi ilə danışıqları dayandırması səbəb olub. Hüquq-mühafizə orqanları ilə aksiya iştirakçıları arasında yaranan çaxnaşma zamanı hər iki tərəfdən xəsarət alanların olduğu bildirilir.

Daxili İşlər Nazirliyinin yaydığı məlumata görə, dekabr ayının 1-dən 2-nə keçən gecə 21 polis əməkdaşı müxtəlif dərəcəli bədən xəsarətləri alıb. Onlardan ikisinin vəziyyəti ağırdır. Ümumilikdə etirazlar başlayandan bu günə qədər 113 polis yaralanıb.

Aksiya iştirakçılarını dəstəkləyən hazırkı ölkə prezidenti Salome Zurabişvilli isə bildirib ki, mülki əhalidən yaralananların əksəriyyəti döyülərək üz və baş nahiyəsindən xəsarət alıblar. Etirazçıları geri addım atmamağa səsləyən S.Zurabişvili qeyd edib ki, Gürcüstanın gələcəyi bu aksiyalardan asılıdır.

Hazırda Tbilisidə parlament binasının qarşısındakı yol bağlanıb. Aksiya iştirakçıları istədiklərinə nail olana qədər etirazlara davam edəcəklərini bildiriblər.