General ələ keçdi | Boliviya Ordusu ölkəni bir-birinə qatdı

Boliviyada dövlət çevrilişinə cəhd edən general Xuan Xose Zuniqa saxlanılıb.

O, polis əməkdaşlarının müşayiəti ilə ordunun Baş Qərargahından çıxarılıb. Boliviya Prokurorluğu generalı terrorizmdə ittiham edir.

Qeyd edək ki, iyunun 26-da Boliviyada dövlət çevrilişinə cəhd edilib. Boliviya Ordusunun bölmələri paytaxtdakı Hökumət Sarayına zorla daxil olub. Qarşıdurma zamanı ən azı doqquz nəfər yaralanıb.

Boliviya Prezidenti Luis Arse ordunun bu hərəkətini dövlət çevrilişi adlandırıb və vətəndaşları demokratiyanı müdafiə etməyə çağırıb. O, eyni zamanda ölkədə çevriliş cəhdi fonunda ordunun yeni hərbi rəhbərliyini təyin edib. Boliviya hökuməti isə dövlət çevrilişinə cəhd xəbərləri fonunda beynəlxalq ictimaiyyəti ölkənin qanuni hakimiyyətinə dəstək verməyə çağırıb.