Gizli razılaşma iddiası | Putinin tələbinə Tramp elə bir cavab verdi ki...

Donald Tramp və Vladimir Putinin 15 avqustda baş tutan Alyaska görüşünün detalları hələ də müzakirə mövzusudur. Görüşlə bağlı rəsmi məlumatlar kifayət qədər qıt idi, bu da müxtəlif versiyaların yayılmasını şərtləndirib.

– Görüşdə nələr müzakirə edilib, nələr razılaşdırılıb?

– Görüşün məhz Alyaskada keçirilməsi təşəbbüsü hansı tərəfə məxsus idi?

Bu və digər suallar açıq olaraq qalır.

V.Putin “Valday” klubunda sualları cavablandırarkən eyni məsələ yenidən gündəmə gəlib.

Rusiyalı tədqiqatçı, beynəlxalq məsələlər üzrə ekspert Fyodor Lukyanov soruşub:

“Alyaskada görüşmək kimin ideyası idi?”.

V.Putin isə cavabında bunu açıqlamayıb, sadəcə qeyd edib ki, nə fərqi var, əsas odur ki, görüşdük.

“Moskovski Komsomolets” nəşri iddia edir ki, Alyaska görüşünün təfərrüatını mənbələrdən əldə edib. İddiaya görə, görüşün Alyaskada keçirilməsi təşəbbüsü V.Putinə məxsus olub:

“İki Prezident arasında görüş üçün ABŞ-nin Birləşmiş Ərəb Əmirliklərini təklif edəcəyi proqnozlaşdırılan idi. Amerikanın ikinci ideyası isə Şotlandiya ola bilərdi, hərçənd orada siyasi elita V.Putinə nifrət edir. Daha sonra V.Putin Alyaskanı təklif etdi və qəbul olundu”.

Nəşr iddia edir ki, Moskvada D.Trampın nümayəndəsi Stiv Uitkoffla görüş zamanı V.Putin ABŞ-nin sülh planı ilə razılaşıb.

“Lakin V.Putin Alyaskada Ukrayna qoşunlarının tamamilə Donbasdan çıxarılmasını tələb etdi, D.Tramp isə bunu nəzərə alacağını və sonra cavab verəcəyini deyib. Lakin cavab sükutla əvəzləndi və bu hər kəsin qəbul etdiyi “susmaq razılıq əlamətidir” demək deyil, əksinə, fikir ayrılığından qaynaqlanır”, – nəşr yazır.

Görünür, D.Tramp Alyaskada V.Putinə müəyyən vədlər verərək onu aldadıb.