Gürcüstan hökumətindən vətəndaşları sevindirəcək addım

Gürcüstanda koronavirus pandemiyası dönəmində karantin rejimi qaydalarının pozulmasına görə vətəndaşlara yazılan cərimələr silinəcək.

Qonşu ölkənin Baş naziri İrakli Kobaxidzenin verdiyi məlumata görə, amnistiya iki minə yaxın vətəndaşa şamil ediləcək.

Səhiyyə üzrə ekspert Maka Beluaşvili pandemiya dövründə xəstəxanalara yazılan cərimələrin də silinəcəyini bildirib:

“Səhiyyə Nazirliyinin və hökumətin təşəbbüsü ilə COVID-19 dövründə vətəndaşlara və hüquqi şəxslərə yazılmış cərimələrin silinməsi qərara alındı. Pandemiya dövründə vəziyyət çox gərgin idi və istər sənədləşmə, istərsə də müəyyən icazələrin alınması, müraciətlərin edilməsi kimi hallarda səhvlər baş verirdi. Bu da öz növbəsində cərimələrin yazılmasına gətirib çıxarırdı.

Qeyd edim ki, vətəndaşlarla yanaşı, xəstəxanalar da cərimələnmişdi ki, bütün bunlar sənədləşmə ilə bağlı idi. Çətin zamanda əsas məqsədin insan həyatını xilas etmək olduğunu nəzərə alsaq, bu gün cərimələrin silinməsi çox düzgün qərardır”.

Qeyd edək ki, Gürcüstan hökumətinin qərarına əsasən, 1855 fiziki və 38 hüquqi şəxs sözügedən cərimələrdən azad olunacaq. Ümumi məbləğ 5,6 milyon lari, təqribən 3,5 milyon manat təşkil edəcək.