Gürcüstan parlamenti qalmaqallı qanuna qoyulan vetonu ləğv etdi

Gürcüstan parlamenti Prezident Salome Zurabişvilinin "Xarici təsir haqqında” qanuna veto qoymasını səs çoxluğu ilə ləğv edib.

Bu barədə Gürcüstanın yerli mediası məlumat yayıb.

Parlament Prezidentin mübahisəli “Xarici təsir qanunu”na qoyduğu vetonun ləğvi ilə bağlı gün ərzində səsvermə keçirib. Qanunun lehinə 84, əleyhinə isə 4 deputat səs verib.

Müzakirələr zamanı parlament binasının ətrafında etiraz aksiyası keçirilib. Binanın girişinə toplanan etirazçılar hakim “Gürcü Arzusu” partiyası və təqdim etdiyi “Xarici təsirin şəffaflığı haqqında” qanun layihəsi əleyhinə müxtəlif şüarlar səsləndiriblər.

Hüquq-mühafizə orqanlarının əməkdaşları və xüsusi təyinatlılar tərəfindən etirazçılara nəzarət üçün canlı dəhliz yaradılıb.

Qeyd edək ki, Gürcüstan Prezidenti Salome Zurabişvili hakim "Gürcü Arzusu" partiyasının təqdim etdiyi "Xarici təsirin şəffaflığı haqqında" qanuna veto qoymuşdu.

Bu arada Avropa İttifaqının xarici siyasət rəhbəri Cozep Borrell “X” platformasında paylaşımında bildirib ki, adıçəkilən qanun Avropa İttifaqı dəyərlərinə uyğun deyil.

“Qanun qəbul olunarsa, iyunda Xarici İşlər Nazirləri Şurasının iclasında bununla bağlı qərar qəbul edəcəyik”, – deyə C.Borrell qeyd edib.