Gürcüstandan sərt mesaj: "Brüsselin alqışı üçün qan tökməyəcəyik"

Gürcüstan parlamentinin vitse-spikeri Tea Tsulukiani ölkəsinin Qərbin gözləntiləri naminə müharibəyə sürüklənməyəcəyini açıq şəkildə bəyan edib.

Tsulukianinin sözlərinə görə, Gürcüstanın əsas milli marağı öz vətəndaşlarının həyatını qorumaqdır:

“Mən Gürcüstanda elə bir gürcü tanımıram ki, Brüsselin alqışını qazanmaq üçün öz oğullarının döyüşməsini istəsin. Gürcüstanın qan tökmək üçün bu qədər insanı yoxdur. Seçim zamanı biz əlbəttə ki, həyatı seçirik. Bu bizim ən böyük milli marağımızdır”.

O əlavə edib ki, əgər Gürcüstan Brüsselin gözləntisinə uyğun olaraq “ikinci cəbhə”ni açmağa və Baltikyanı ölkələri qorumaq üçün Rusiya zərbəsini üzərinə götürməyə razı olsaydı, o zaman Qərbdən böyük tərif alardı.

Tsulukiani qeyd edib ki, Tbilisi ölkəni xarici güclərin geosiyasi oyunlarına qurban vermək niyyətində deyil.