Gürcüstan vətəndaşları qiymət artımından narazıdır
Gürcüstanda vətəndaşlar bütün sahələrdə müşahidə edilən kəskin qiymət artımından narazıdırlar.
“Gündəlik olaraq ailədə istifadə etdiyimiz ərzaq məhsulları mütəmadi olaraq bahalaşır. Ümumiyyətlə, bütün sahələrdə qiymətlər kəskin qalxıb və hazırkı vəziyyət həqiqətən inanılmazdır. Maaşlarımızla çətin də olsa, idarə edirik. Aclıqdan ölməməyə çalışırıq”, - deyə sakinlərdən biri deyib.
Bəzi paytaxt sakinləri isə ölkədəki qiymət artımının rekord həddə çatdığını deyirlər. Xüsusilə Tbilisinin yaşlı sakinləri təqaüdlərinin yalnız çörək almağa yetdiyini bildirirlər.
Vətəndaşların bu cür çətinlik çəkməsinin səbəbinə isə Baku TV-yə verdiyi müsahibəsində iqtisadçı ekspert Ana Qoqoladze aydınlıq gətirib. O, Gürcüstan iqtisadiyyatının inkişafının Rusiya-Ukrayna müharibəsi səbəbi ilə ölkəyə kütləvi axın edən ruslarla əlaqəli olduğunu deyib. Gürcü ekspert müharibə bitdikdən sonra isə ölkədə vəziyyətin daha da ağırlaşacağını vurğulayıb.
2022-ci ilin dekabr ayına olan məlumata görə, Gürcüstanda 1 919 999 nəfərin kredit borcu var.