Gürcüstanda etiraz aksiyalarının növbəti dalğası başladı

Qonşu Gürcüstanda etirazlar səngimir.

Paytaxt Tbilisidə vətəndaş cəmiyyəti təşkilatlarının çağırışı ilə parlament binasının qarşısına toplanan minlərlə nümayişçi hakim “Gürcü Arzusu” partiyasının yenidən parlamentə təqdim etdiyi “Xarici təsirin şəffaflığı haqqında” qanun layihəsinə etiraz edib.

“Biz gənclər olaraq Rusiya qanununa qarşı yenidən aksiyadayıq. Hakimiyyət illərdir ki, bu qanunu qəbul etməyə çalışır. Ancaq biz buna imkan verməyəcəyik. Ölkəmizdə bu qanunun olması bizim Avropaya inteqrasiyamıza maneə olacaq. Gürcü xalqı rus qanununa “yox” deyir”, – aksiya iştirakçısı bildirib.

Onu da bildirək ki, aksiya ilə əlaqədar parlamentin qarşısındakı Rustaveli prospektində avtomobillərin hərəkəti dayandırılıb. Əraziyə çoxlu sayda polis əməkdaşı və xüsusi təyinatlılar cəlb edilib, təhlükəsizlik tədbirləri gücləndirilib.