Gürcüstanda etirazçı ağzını tikdirib

Gürcüstanın İmereti bölgəsinin Çiatura şəhərində günlərdir ki, aksiya keçirən mədənçilərdən biri etiraz əlaməti olaraq fərqli yola əl atıb.

Belə ki, gürcü mədənçi tələblərinin yerinə yetirilmədiyi üçün ağzını tikdirib. Maaş artımı, eləcə də iş şəraitinin və təhlükəsizliyinin yaxşılaşdırılmasını tələb edən mədənçilər şəhər meriyasının qarşısında aclıq aksiyası keçirirlər. Tam gücləri ilə çalışdıqlarını bildirən mədənçilər şirkət rəhbərliyinin onlardan 40% daha çox işləmək tələb etdiklərini, bunun isə imkansız olduğunu deyirlər.

Təxminən 3 000 mədənçinin qoşulduğu aksiyalar zamanı etirazçılar iş üçün lazım olan avadanlıqların olmadığını bildirirlər. Etiraz səbəbi ilə bölgədəki mədənlərin fəaliyyətləri günlərdir ki, dayanıb.

Qeyd edək ki, Çiatura şəhərində Gürcüstanın ən böyük manqan mədənləri fəaliyyət göstərir. Bölgədə eyni zamanda dünyanın ən böyük manqan rezervlərinin yerləşdiyi təxmin edilir.