Gürcüstanda kütləvi etirazlar başlayacaq? | Etiraza səbəb nədir?

Qonşu Gürcüstanda hakim "Gürcü Arzusu" partiyasının "Xarici agentlər" haqqında qanun layihəsini yenidən parlamentə təqdim etməsi gərginliyə səbəb olub.

Belə ki, Gürcüstanın müxalif "Vətəndaşlar" partiyasından olan deputat Aleko Elisaşvili "Rusiya qanunu" kimi xarakterizə etdikləri sənədin təkrar parlamentə göndərilməsinin ölkə vətəndaşlarına qarşı təhqir olduğunu deyib. A.Elisaşvilinin bəyanatını hakim partiyadan olan deputatlar etirazla qarşılayıblar, bu isə daha sonra qarşıdurmaya çevrilib.

Məsələyə münasibət bildirən gürcüstanlı siyasi şərhçi Simon Kopadze Baku TV-yə açıqlamasında bildirib ki, yaxın vaxtlarda Gürcüstanda kütləvi etirazlar başlayacaq:

“Parlamentimizdə vəziyyətin ağır olduğuna bir daha şahid olduq. Bu qanun layihəsi ötən il parlamentə təqdim ediləndə baş verənlər hər kəsə məlumdur. O hadisələrdən sonra bu il yenidən eyni addımı atsalar da, nəticə dəyişməyəcək.

Avropa İttifaqına namizəd statusu aldıq, Avropa çempionatına vəsiqə qazandıq, bu o demək deyil ki, gürcü xalqı etirazını bildirməyəcək. Düşünürəm ki, yaxın vaxtlarda Gürcüstanda, Tbilisidə kütləvi etiraz aksiyalarının keçirilməsinə başlanılacaq”.

Məlumat üçün bildirək ki, layihə aprelin 8-də parlamentin büro iclasına təqdim ediləcək, daha sonra isə müzakirəyə çıxarılacaq. Qanun layihəsi illik büdcəsinin 20%-dən çoxu xarici donorlar hesabına formalaşan qeyri-kommersiya təşkilatlarının, həmçinin media orqanlarının “xarici qüvvələrin maraqlarını təbliğ edən təşkilat” kimi reyestrdən keçməsini, həmçinin hər il maliyyə bəyanatı təqdim etməsini tələb edir. Qaydalara riayət etməyən təşkilatların 25 min lari, təxminən 16 min manatadək cərimələnməsi nəzərdə tutulur.