Gürcüstanda onkoloji xəstəliklərin müalicəsi dövlət tərəfindən qarşılanacaq

Qonşu Gürcüstanda onkoloji xəstələrin müalicəsi dövlət tərəfindən tam maliyyələşdiriləcək.

Belə ki, xərçəng xəstəliyi daşıyan vətəndaşların müalicəyə çıxış imkanlarını artırmaq üçün ümumi sağlamlığın qorunması üzrə dövlət proqramına dəyişikliklər edilib. Gürcüstan hökumət administrasiyasının məlumatına əsasən, ölkə üzrə bütün xərçəng xəstələri üçün kimyaterapiya, şüa terapiyası, hormon terapiyası və dərman preparatlarının xərcləri dövlət tərəfindən qarşılanacaq.

“Geohospitals” xəstəxanasının direktoru Nona Asatiani onkoloji xəstələrin müalicəsi üçün böyük xərclərin tələb olunduğunu qeyd edib:

“İstər dərman preparatları, istərsə də kimyaterapiya, şüa terapiyası və digər müalicə üsullarının ödənişini bütün vətəndaşlar qarşılaya bilmirlər. Buna görə də hökumətin bu addımı olduqca təqdirəlayiqdir. Gürcüstanda ümumi sağlamlığın qorunması üzrə dövlət proqramı fəaliyyət göstərir və bu proqramla bir çox tibbi xidmətlər vətəndaşlar üçün dövlət tərəfindən qarşılanır. Bu günədək onkoloji cərrahiyyə üçün 15 000 larilik, digər onkoloji xidmətlər üçün isə 12 000 larilik maliyyələşdirmə mövcud idi. Artıq bu rəqəmlərin də artırılması istiqamətində işlər görülür”.

Sakinlər də hökumətin bu qərarından məmnunluqlarını ifadə edirlər.

“Dərmanlarla yanaşı, müayinə xərcləri də tam qarşılanır. Mən özüm onkoloji xəstəyəm və bu yardımdan çox şadam. Dövlətin yardımı olmasa, nə müayinə oluna bilərdim, nə də ki müalicə. Hökumətimizə təşəkkür edirəm”, – Gürcüstan sakini deyib.

Məlumat üçün onu da bildirək ki, yeni qəraradək Gürcüstanda yalnız illik gəliri 40 min laridən az olan xəstələr dövlətin onkoloji xəstələr üçün ayırdığı yardımdan yararlana bilirdilərsə, artıq tətbiq edilən universal səhiyyə proqramı çərçivəsində onkoloji xəstəliklərin müalicəsi gəlirindən asılı olmayaraq hər bir vətəndaş üçün əlçatan olacaq.