Gürcüstanın məqsədi nədir?

“Gürcüstanda böyük gərginliyə səbəb olan “Xarici agentlər haqqında” qanun layihəsi yersiz idi. Baş nazirin bəyanatları isə göstərib ki, parlamentin geri addım atmasına baxmayaraq, Gürcüstanın Avropa İttifaqına namizədlik statusu alması üçün hələ də lazımi işlər görülmür”.

Bunu Baku TV-yə verdikləri müsahibələrində gürcü politoloq və siyasətçilər deyiblər.

“İlk olaraq onu qeyd etmək lazımdır ki, məlum qanun layihəsinə heç ehtiyac da olmayıb. Çünki Gürcüstan qanunvericiliyinə əsasən, xaricdən gələn maliyyələrin yoxlanması və bu barədə cəmiyyətin məlumatlandırılması onsuzda mümkündür. Buna görə də etirazçıları dəstəkləyirəm. Onlar ölkənin layiqli vətəndaşlarıdır. Keçirilən etiraz aksiyalarından bəlli olub ki, gənclərimiz gələcəkdə də heç bir haqsızlığa boyun əyməyəcək. Onlar hər zaman öz haqlarını tələb edəcəklər”, - deyə Zaal Sarajişvili bildirib.

Politoloqlar qeyd ediblər ki, Gürcüstan xalqı ölkənin firavan gələcəyi üçün lazımi addımları atmağa hazırdır.