HƏMAS nümayəndəsindən xəbərdarlıq

"İsrail Ordusunun HƏMAS-ın yüksəkrütbəli komandirini öldürməsi Qəzza sektorunda atəşkəs rejimini təhlükə altına qoyur".

Bunu HƏMAS-ın danışıqlar qrupunun rəhbəri Xəlil əl-Hayya deyib.

O, dekabrın 13-də İsrailin hava zərbələri səbəbindən qrupun yüksəkrütbəli komandiri Raed Saadın həlak olduğunu təsdiqləyib.

Bildirilir ki, bu, ABŞ-nin dəstəyi ilə oktyabrda qüvvəyə minən atəşkəs razılaşmasından bəri HƏMAS-ın yüksəksəviyyəli nümayəndəsinin ən səs-küylü qətli olub. İsrailin atəşkəsi davamlı şəkildə pozması və Raed Saadla yanaşı, başqalarına qarşı son qətllər razılaşmanın davamlılığını təhlükə altına salır.

"Biz vasitəçiləri, xüsusilə ABŞ hökumətini və Donald Trampı İsraili atəşkəsi qorumağa məcbur etmək üçün fəaliyyət göstərməyə çağırırıq", – deyə əl-Hayya vurğulayıb.

O həmçinin BMT-nin Beynəlxalq Sabitləşdirmə Qüvvələrinin Qəzzada yerləşdirilməsi ilə bağlı ehtimallara münasibət bildirib.

"Beynəlxalq qüvvələrin rolu yalnız atəşkəsin qorunması və tərəflərin Qəzza sərhədləri boyunca ayrılması ilə məhdudlaşmalıdır. Bu, anklav daxilində hər hansı müdaxilə olmadan həyata keçirilməlidir", – deyə HƏMAS nümayəndəsi əlavə edib.