Hakan Fidan Ər-Riyadda Ərəb Liqasının toplantısında iştirak edib

Ər-Riyadda Suriyadakı vəziyyətlə bağlı keçirilən danışıqlarda iştirak edənlər Dəməşqdə hakimiyyət dəyişikliyindən sonra Suriyada siyasi prosesə dəstək yollarını müzakirə ediblər.

Bu barədə Səudiyyə Ərəbistanı Xarici İşlər Nazirliyinin görüşün yekunlarına dair bəyanatında deyilir.

“İştirakçılar Suriyada siyasi keçid prosesinə dəstək məsələsini müzakirə ediblər. Hansı ki, Suriyanın siyasi və ictimai qüvvələri bütün suriyalıların hüquqlarına hörmət edilməklə təmsil olunacaqlar”, – deyə sənəddə qeyd olunur.

İştirakçılar həmçinin Suriyanın müstəqilliyinə və suverenliyinə hörmət etməklə, dialoq, dəstək, məsləhət və məsləhətləşmələr yolu ilə müxtəlif tərəflər arasında istənilən problem və ya narahatlığı aradan qaldırmaq üçün işləməyə hazır olduqlarını bildiriblər.

Türkiyənin xarici işlər naziri Hakan Fidan qeyd edib ki, ərəb ölkələri Suriyanın yenidən qurulmasına kömək etmək üçün səyləri əlaqələndirmək məqsədilə birgə mexanizm yaratmalıdır.

O bildirib ki, Suriya üçün bu kritik dövrdə bölgə ölkələri balanslaşdırıcı qüvvə kimi çıxış etməlidir.

“Biz səylərimizi daha səmərəli etmək üçün koordinasiya mexanizmi və ya müvafiq komitələr yarada bilərik. Biz Suriyada sanksiyaların götürülməli olduğu prioritet sektorları müəyyən etməliyik. Həmçinin bizim əsas prioritetimiz Suriyanın ərazi bütövlüyünü və birliyini qoruyub saxlamaq olmalıdır”, – deyə Hakan Fidan vurğulayıb.