Harrisin tərəfdarlarına qarşı sərt tənqid | Mask məsələyə qarışdı

ABŞ-də Nyu-York ştatının yerli hakimiyyətinin “Araxis” ləqəbi ilə məşhur olan evcil sincabı evtanaziya üsulu ilə öldürməsi qalmaqala yol açıb.

Bloger Mark Lonqo evində “Araxis” ləqəbli sincab və “Fred” ləqəbli yenot saxlayıb. Nyu-York ştatının Ətraf Mühit Departamentinin əməkdaşları blogerin evinə gəlib və sincabla yenotu müsadirə ediblər.

Qeyd olunub ki, bu addım qonşuların çoxsaylı şikayətləri əsasında atılıb. Ştatın hakimiyyət orqanları heyvanların quduzluq daşıyıcısı olması ehtimalını səbəb gətirərək onları zəhərli iynə ilə öldürməyə qərar verib.

Heyvanların ölümü barədə xəbər üzə çıxdıqdan sonra sosial şəbəkə istifadəçiləri kütləvi surətdə buna etirazlarını bildiriblər.

Müzakirələrə milyarder iş adamı İlon Mask da qoşulub. O, “X”dəki paylaşımında yazıb ki, Donald Tramp prezident seçiləndən sonra bütün sincablar xilas ola biləcəklər. İlon Mask sincabı edam etməklə ştat hakimiyyətinin səlahiyyətini aşdığını da iddia edib.

Ekspertlərin fikrincə, sincabın ölümü ABŞ-də prezident seçkilərinin taleyini həll edə bilər.

Qeyd edək ki, Nyu-York ştatının yerli hakimiyyəti prezidentliyə demokrat namizəd Kamala Harrisi dəstəkləyir.