Hərbi xidmətlə bağlı yeni qanun layihəsi narazılıqlara səbəb oldu

Almaniyanın bir sıra şəhərlərində minlərlə məktəbli Bundestaqın hərbi xidmətin yeni modeli haqqında qanun layihəsini qəbul etməsinə etiraz olaraq nümayişlərdə iştirak edib.

Etiraz aksiyaları "Məktəblərin hərbi xidmətə çağırışa qarşı tətili" şüarı altında keçirilib.

Polisin məlumatına görə, təxminən 3000 nəfər Berlində toplaşaraq Kroytsberq rayonunun küçələri ilə yürüş keçirib.

Etirazlara Hamburqda 1700, Dortmundda 1000 və Frankfurt-Mayndə 600-ə yaxın insan qatılıb. Nümayişçilər əllərində "Bundesver üçün bir nəfər də yox, bir sent də yox", "Təhsil üçün daha çox, silah üçün daha az", "Məcburi xidmət olmadan gələcək üçün" kimi şüarlar yazılmış lövhələr tutublar.

Ölkənin cənubunda – Münhen və Ştutqartda da etiraz aksiyaları keçirilib.

Qeyd edək ki, dekabrın 5-də Bundestaq Almaniyada hərbi xidmətin yeni modeli haqqında qanun layihəsini qəbul edib.

Almaniyanın müdafiə naziri Boris Pistorius tərəfindən təklif edilən qanun layihəsi gənclərin tibbi müayinədən keçməsini və hərbi qeydiyyatı bərpa etməyi tələb edir.

Potensial işə qəbul olunanlardan fiziki hazırlığı və Almaniya Silahlı Qüvvələrinə qoşulmağa hazır olduqları barədə sorğu anketlərini doldurmaq tələb olunacaq.