Hindistan fövqəladə vəziyyətə hazırlaşır | Nipah virusu yayılmağa başlayıb - Baku TV

Hindistanın Kəlkətə şəhəri yaxınlığında peyvəndi və ya müalicəsi olmayan ölümcül Nipah virusu yayılıb.

Bu barədə "The Economic Times" qəzeti məlumat verib.

Qərbi Benqal əyalətində virusa yoluxmanın 5 halı aşkar edilib ki, bunlardan 3-ü son 5 gündə qeydə alınıb. Yoluxanlar arasında həkim və tibb bacıları da var.

Yeni ildən dərhal sonra Kəlkətə yaxınlığındakı özəl xəstəxanada işləyən daha iki tibb bacısında virus aşkarlanıb. Hər ikisində yüksək qızdırma və nəfəs almaqda çətinlik yaranıb. Yoluxmuş qadınlardan biri komaya düşüb. Hesab edilir ki, o, testlər aparılmazdan əvvəl vəfat edən bir xəstəni müalicə edərkən virusa yoluxub.

Nipah virusu yarasalar tərəfindən yayılan bir patogendir. Virus heyvanlardan insanlara ötürülə bilər və ağır formalarda ensefalit və tənəffüs yoluxucu xəstəliklərə səbəb ola bilər, bəzi hallarda ölüm nisbəti 80%-ə çatır.

Nipah virusu hər il Cənubi və Cənub-Şərqi Asiyanın müxtəlif bölgələrində baş verir və bu da xeyli ölümlə nəticələnir. 1998-ci ildə aşkarlandığı vaxtdan bəri təxminən 1000 insan yoluxub.