Hindistan-Pakistan gərginliyi nüvə savaşına çevriləcək?

Hindistan Pakistanla sərhəddə Çenab çayı üzərindəki Baqlihar bəndi vasitəsilə suyun buraxılışını müvəqqəti dayandırıb. Bu isə Pakistanda su böhranı təhdidi yaradıb. Daha dəqiq desək, Pəncab, Cəmmu və Kəşmir susuz qala bilər.

İslamabadda bu addımlar Hindistanın həyata keçirdiyi “su terroru” kimi qiymətləndirilir.

Pakistanın Milli Təhlükəsizlik Komitəsi su blokadasını belə adlandırıb.

“Su Pakistanın xilas dairəsidir. Çayın qarşısının birtərəfli qaydada kəsilməsi, həm Yeni Dehlinin üzərinə götürdüyü öhdəlikləri pozması, həm də dünyaya təhdid yaratmasıdır”, ‒ bəyanatda deyilir.

Pakistanın irriqasiya departamentinin məmurları “samaa.tv”yə bildiriblər ki, son 24 saat ərzində Çenab çayından Hed-Marala su axını 87 min kubmetrdən 10 800-ə qədər azalıb. Bu isə Celam kimi regionlarda susuzluq riskini artırır.

Hindistan Celam çayı üzərindəki Kişanqanq bəndində də oxşar addım atmağı planlaşdırır. Nüvə silahına malik ölkələr arasında gərginliyin bu qədər artması heç də nikbin proqnozlara yol açmır.

Pakistanın ballistik raket sınaqları, ardınca Hindistanın hərbi hava qüvvələrini döyüşə hazır vəziyyətə gətirməsi BMT və ABŞ-ni narahat etməyə başlayıb. Antonio Quterreş və ABŞ dövlət departamenti tərəflərə çağırış edərək bildirib ki, sabitliyi qorumaq lazımdır. Lakin Hindistan “su terroru”na davam edir və beynəlxalq ictimaiyyətin çağırışlarına məhəl qoymur.

Qeyd edək ki, Pəncabda milyonlarla insan su kanallarından asılıdır. Həmin kanalları isə su ilə Hindistanın susuz qoymağa çalışdığı Çenab və Cəlam çayları təmin edir.