Hindistan və Pakistan atəşkəsə əməl edəcək? - Pakistanlı politoloq Baku TV-yə danışdı

Hindisan tərəfi Baqlihar su bəndinin fəaliyyətini bərpa edib.

Qeyd edək ki, Yeni Dehli iki həftədən çox idi ki, Pakistanın suya çıxışını məhdudlaşdırmışdı. Hindistan bu addımı 22 apreldə Kəşmirdəki terror aktından sonra atıb.

O ki qaldı suya qoyulan məhdudiyyətin aradan qaldırılmasına, “Baku TV”yə danışan pakistanlı politoloq bildirib ki, bəndlərin hamısı öz fəaliyyətini bərpa etməyib. Təkcə Baqliharın işini davam etdirməsini isə bəlli irəliləyiş saymaq olar:

“Hindistanın Baqliharda su kanalının fəaliyyətini yenidən bərpa etməsi və həmin ərazilərdə yaşayan pakistanlıların su təchizatının təmin edilməsi həqiqətdir. Amma gəlin etiraf edək ki, Hindistan bunu öz humanistliyi səbəbi ilə deyil, başda Donald Tramp olmaqla dünyadan gələn təzyiqlər fonunda etdi. Tərəflər arasında əldə edilən atəşkəs artıq öz bəhrəsini verir.

Ölkələr arasında gərginlik tam yox olmasa da, ən azından silahlı hücumlar müşahidə edilmir. Hindistanın nə vaxta qədər atəşkəsə əməl edəcəyi barədə bir söz deyə bilmərəm. Amma bəlli olan odur ki, hər iki ölkə diplomatik münasibətlərini bir daha gözdən keçirməli və danışıqlar aparmalıdır”.

Xatırladaq ki, Hindistan mediasının yazdığına görə, hazırda Yeni Dehli Pakistanla danışıqlara hazırdır, lakin bu, siyasi yox, hərbi istiqamətdə baş tuta bilər.