Hindistanda dini ayin niyə faciə ilə bitdi? - Ölənlərin sayı artdı

Hindistanın Uttar Pradeş ştatında dini ibadətgahda ayin zamanı baş verən izdihamda ölənlərin sayı 121-ə çatıb.

Bu barədə ştatın rəsmi qurumları açıqlama yayıb. Ölü sayının artacağı istisna edilmir. Çünki xəsarət alanlar arasında ağır vəziyyətdə olanlar da var.

Qeyd edək ki, hadisə iyulun 2-də Muğal Qarhi kəndində baş verib. Təxminən 50 minə yaxın adamın iştirak etdiyi dini ayin zamanı yaranmış sıxlıqda ölənlərin çoxu qadınlardır. Bundan başqa, ölənlər arasında uşaqlar da var. Hadisə baş verən vaxt havanın isti olması ölüm hallarının çoxalması ilə nəticələnib.

Bu arada, Azərbaycanın Hindistandakı səfirliyi rəsmi Dehliyə başsağlığı verib. Bu barədə diplomatik missiyanın sosial şəbəkə hesabında qeyd olunub. “Azərbaycanın Hindistandakı səfirliyi Hathrasda çoxlu sayda insanın faciəvi şəkildə həlak olmasından dərin kədər hissi keçirir. Biz Hindistan hökumətinə və xalqına, həlak olanların ailələrinə dərin hüznlə başsağlığı verir və yaralananların tezliklə sağalmasını arzulayırıq”, – deyə məlumatda bildirilib.