Hindistanda milyonlar xərclənən 3 günlük şənlik

İlin ən dəbdəbəli toylarından biri Udaypurda baş tutub: əczaçılıq imperiyasının varisi Netra Mantena ilə nyu-yorklu texnologiya sahibkarı Vamsi Qadirajunun üçgünlük şənliyi.

Şənliyin miqyası hətta hər şeyə alışmış Bollivudu belə şoka salıb.

Mərasimlər şəhərin ən ikonik yerlərindən bəzilərində, Ceyms Bondun filmi “Ahtapot”dan tamaşaçılara tanış olan Tac Gölü Sarayından tutmuş Piçola gölündəki Caqmandir Adası Sarayına qədər baş tutub.

Cennifer Lopes toydan əvvəlki əsas axşamlardan birində çıxış edib. Müğənni üçün bu, Hindistana ilk səfər olub və o, tam şou nümayiş etdirib: “Get Right”, “Ain’t Your Mama” və “Waiting for Tonight” hitlərini səsləndirib, bir neçə dəfə səhnə kostyumunu dəyişdirib. Cennifer Lopes 2 milyon dollar qonorar alıb.

Toyun ən əhəmiyyətli vizual simvolu fransız şirniyyatçısı Basten Blan-Taye tərəfindən hazırlanmış, təxminən 4,5 metr hündürlüyündə nəhəng, qar kimi ağ tort olub. Tort miniatür saray kimi, fil, pələng və mürəkkəb şəkər heykəlləri ilə bəzədilib.

Qonaq siyahısında Hindistanın və dünyanın ən yaxşıları: Ranvir Sinqh, Şahid Kapur, Madhuri Diksit, Karan Cohar, Krit Sanon yer alıb. Qərb qonaqları arasında kiçik Donald Tramp və sevgilisi Bettina Anderson da görüntülənib.

Bəzi məlumatlara görə, dəbdəbəli toy üçün 6,4-6,8 milyon dollar xərclənib. Bununla belə, sosial mediada narazılıqlar yaranıb və bəzi istifadəçilər toyun dəbdəbəli keçirilməsini “pul itkisi” adlandırıblar. Lakin şənliyin miqyası artıq 2024-cü ildə Rihanna, Keti Perri və Castin Biberin çıxış etdiyi əfsanəvi Ambani ailəsinin toyu ilə müqayisə olunur.