Hörmüz boğazında gözlənilməz PUA hücumu | Gərginlik daha da alovlanacaq? - Baku TV

Hörmüz boğazında "San Antonio" konteyner gəmisi pilotsuz uçuş aparatının zərbəsinə məruz qalıb. Hadisə nəticəsində Filippindən olan 7 ekipaj üzvü xəsarət alıb.

Bu barədə Filippinin "PNA" agentliyi əməkçi miqrantlarla iş üzrə nazir Hans Leo Kakdaka istinadən məlumat yayıb.

Onun sözlərinə görə, pilotsuz uçuş aparatının zərbəsi nəticəsində dörd filippinli yüngül xəsarət alıb, üç nəfər reanimasiyadadır. Daha əvvəl Fransanın "CMA CGM" şirkətinə məxsus gəminin hücuma məruz qaldığı bildirilmişdi.

Bu arada Fransanın xarici işlər naziri Jan-Noel Barro Hörmüz boğazı blokadada qaldığı müddətdə İrana qarşı beynəlxalq sanksiyaların yumşaldılmasının mümkünsüz olduğunu bildirib.

Bu barədə nazir Fransanın RTL radiostansiyasının efirində danışıb. "İran, ya da heç olmasa İran rejimi nüvə proqramının nizamlanması müqabilində ABŞ-nin sanksiyaları yumşaltmasına nail olmağa çalışır. Lakin Hörmüz boğazı blokadada qaldığı müddətdə sanksiyaların ləğvi əsla mümkün deyil", – deyə o bildirib.

Fransa XİN başçısı boğazın bəşəriyyətin ümumi sərvəti olduğunu vurğulayıb. "Heç bir şəraitdə onu blokadaya almaq, rüsum tətbiq etmək və ya şantaj üçün istifadə etmək olmaz", – deyə fransalı nazir bildirib.

Barro həmçinin bəyan edib ki, Yaxın Şərqdə davamlı siyasi həll İran hakimiyyətinin ciddi güzəştləri olmadan mümkün deyil. Onun fikrincə, Tehran regionda dinc birgəyaşayışı təmin etmək üçün öz mövqeyini kökündən dəyişdirməlidir.