Hörmüz boğazından keçid qaydaları dəyişir | İran yeni mexanizm hazırladı - Baku TV

İran Hörmüz boğazından təhlükəsiz keçidin təmin edilməsi üçün bu su yolunun sığorta vasitəsilə idarə olunması planını təqdim edib.

“Fars” agentliyinin verdiyi məlumata əsasən, məqsəd postmüharibə dövründə boğaz üzərində beynəlxalq hüquqa uyğun idarəetmə imkanları yaratmaq və İran üçün iqtisadi gəlir əldə etməkdir.

Məlumata əsasən, İran bu yanaşma ilə Hörmüz boğazının idarə olunmasını sığorta sistemi vasitəsilə mümkün etməyə çalışır ki, bu model həm sülh dövründə ölkələr tərəfindən qəbul olunsun, həm də boğaz üzərində nəzarət imkanını təmin etsin. Bu model aşağı risklə yanaşı, İrana 10 milyard dollardan artıq gəlir gətirə bilər.

Həmçinin qeyd edilib ki, beynəlxalq hüquqa əsasən, müharibədən sonrakı dövrdə gəmilərdən rüsum alınması mümkündür. Lakin bunun siyasi nəticələri ola bilər və bu halda boğazın idarə olunması yalnız xidmət satışı ilə məhdudlaşar.

Hesablamalara görə, belə vəziyyətdə İranın maksimum gəliri 2 milyard dollar ola bilər.

O da bildirilib ki, infrastruktur məhdudiyyətləri nəzərə alınmasa belə, xidmət satışı yüksək gəlir potensialına malik deyil.

Bununla yanaşı, Hörmüz boğasının sığorta vasitəsilə idarə olunması tamamilə mülki xarakter daşıyır və rüsumlardan fərqli olaraq ölkələr tərəfindən də qəbul oluna bilər.