İbrahim Tatlısəs və oğlu arasında qalmaqal böyüdü

Türkiyənin məşhur müğənnisi İbrahim Tatlıseslə oğlu Ahmet Tatlıses arasında gərginlik davam edir.

Son aylarda ata-oğul münasibətləri məhkəmənin Ahmetə atasına yaxınlaşmağı qadağan etməsindən sonra daha da ağırlaşıb.

Bu qərar nəticəsində Ahmetin müğənniyə yaxınlaşmasının qarşısını almaq üçün ona elektron qolbaq taxılıb. İbrahim Tatlısesə də polisə hər hansı potensial pozuntu barədə dərhal məlumat verməsi üçün elektron monitorinq cihazı verilib.

Məşhurun övladı baş verənlərə münasibət bildirib və gərginliyin səbəbini açıqlayıb.

"Atam belə qərar verib və mən buna hörmətlə yanaşıram. Təxminən bir ildir ki, bir-birimizi görmürük. Dörd ildir davam edən məhkəmə işi əmlak mübahisəsi deyil. Yeganə məqsədim bacı-qardaşlarımı və ailəmi qorumaqdır.

Atamın bütün sərvətini 20 yaşlarındakı bir qıza vəsiyyət edəcəyini eşidəndə tədbir görməli oldum. Yeddi uşağı olan bir kişinin bu qərarı mənə çox yanlış gəldi. Bu iş heç də miras mübahisəsi deyil. İndiyə qədər mənə verilən tək şey soyadımdır və mən bunu qürurla daşıyıram", – deyə Ahmet Tatlıses bildirib.