III Dünya müharibəsi, yaxud nüvə savaşı hansı halda başlaya bilər?

“Yeni sanksiyalar Moskvanı incidəcək. Amma sülhə nail olmaq üçün Kiyevin “Tomahawk” raketlərinə ehtiyacı var”.

Bunu Ukrayna Prezidenti Volodimir Zelenski deyib.

Qeyd edək ki, bu, sözügedən raketlərlə bağlı ilk açıqlama deyil. Oktyabrda raketlərin tədarükü ilə bağlı qızğın müzakirələr gedir.

Rusiya da nüvə başlığı daşımaq gücündə olan və kabus adlandırılan uzaqmənzilli raketlərin Ukraynaya verilməsindən narahatdır. Rusiya Prezidenti Vladimir Putin bunun baş verəcəyi təqdirdə ABŞ ilə münasibətlərin pozulacağını bildirib.

Həm də Kreml rəsmən açıqlayıb ki, Ukraynanın istifadə etdiyi uzaqmənzilli raketlərin hazırlandığı ölkələr də Rusiyanın qanuni hədəfinə çevriləcək. Belə olan halda isə III Dünya müharibəsi, nüvə savaşı təhdidi artır.

Zelenskinin israrına baxmayaraq, ABŞ-nin bu raketləri Ukraynaya verməməsi də bu səbəbdən ola bilər. Çünki sülhməramlı Prezident kimi tanınan Ağ Ev rəhbəri Tramp III Dünya müharibəsinə səbəb olmaq istəmir.

Bütün bunların fonunda, Zelenski dəstək üçün Avropaya üz tutub. Avropa liderləri ilə görüşü zamanı Ukraynada sülhü müzakirə edib. Adətən əsas müzakirə Ukraynaya yardım fonunda Rusiyaya təzyiqləri artırmaq ətrafında aparılırdısa, Zelenski bu dəfə daha çox atəşkəsi qabardıb.

İstanbul danışıqlarından sonra atəşkəs Alyaskada müzakirə olunub. Lakin Putinlə Tramp arasında razılaşdırılan bəzi məsələlər Kiyevdə qəbuledilməz adlandırılıb.

Növbəti sülh sammitinin Budapeştdə keçirilməsi planlaşdırılsa da, ABŞ dövlət katibi Marko Rubio ilə Rusiyanın xarici işlər naziri Sergey Lavrov Ağ Ev və Kreml rəhbərlərinin görüşü barədə razılığa gələ bilməyiblər.