İldırım düşməsinin qarşısını dronlar alacaq? | Yapon şirkətindən heyrətləndirici addım

Müasir dünyada ildırım düşməsi hələ də cəmiyyətlər üçün ən dağıdıcı təbii hadisələrdən biri olaraq qalır.

İldırımın haraya və nə zaman düşəcəyini əvvəlcədən bilmək ciddi çətinlik yaratmaqda davam edir və mövcud qoruyucu üsullar hər zaman effektiv nəticə vermir. Lakin bu vəziyyət yaxın gələcəkdə dəyişə bilər.

Belə ki, Yaponiyanın telekommunikasiya şirkəti NTT bildirir ki, buludlardakı elektrik yüklənməsini boşaltmaq üçün göy üzərində idarə olunan süni ildırım yaratmaq üsulu hazırlanıb.

Məlumata əsasən, şirkət xüsusi bir dron vasitəsilə elektrik sahəsindəki dalğalanmaları izləyərək ildırımı özünə çəkməyə nail olub. Bu texnologiya dünyada ilk dəfə reallaşdırılıb. Dronun özünə ildırımın birbaşa düşməsi halında belə zədələnməməsi üçün onun üzərinə xüsusi qoruyucu qəfəs yerləşdirilib.

Şirkət bəyan edib ki, ildırım zərərlərindən azad bir cəmiyyət qurmaq məqsədilə gələcəkdə bu qəfəsli pilotsuz uçuş aparatlarının şəhərləri və strateji infrastrukturu qorumaq üçün geniş şəkildə istifadə edilə biləcəyi gözlənilir.

Qeyd edək ki, yalnız Yaponiyada ildırımın səbəb olduğu illik maddi zərərin 650 milyon ilə 1,3 milyard ABŞ dolları arasında dəyişdiyi bildirilir.

Bundan əlavə, ildırım insanların həyatına birbaşa təhlükə yaratmaqda davam edir. Əgər bu yeni texnologiya uğurlu olarsa, o zaman cəmiyyətlər hər il həm insan həyatına son qoyan, həm də iqtisadiyyata milyardlarla ziyan vuran ildırım fəlakətindən qurtulmuş olacaq.